Presidenti i Ukrainës, Volodymyr Zelensky, ka zhvilluar një bisedë telefonike me të dërguarin e paqes të Donald Trump, Steve Witkoff, dhe me dhëndrin e tij, Jared Kushner, për të diskutuar mbi përpjekjet diplomatike që synojnë t’i japin fund luftës me Rusinë.
Zelensky e cilësoi bisedën si konstruktive, duke thënë se palët “kanë diskutuar mënyrat për të siguruar që Rusia t’i përmbahet çdo marrëveshjeje të mundshme për paqe”.
Ndërkohë, zyrtarë ukrainas po zhvillojnë takime në Miami, ku po shqyrtohen propozimet e SHBA-së për një marrëveshje të mundshme paqeje. Deri më tani, Moska nuk ka bërë asnjë lëshim dhe vijon sulmet ajrore në disa qytete ukrainase.
“Ukraina është e vendosur të punojë me mirëbesim me palën amerikane për të arritur paqe të qëndrueshme. Diskutuam mënyrat që mund të ndalojnë gjakderdhjen dhe të shmangin një pushtim të ri rus në shkallë të plotë,” deklaroi Zelensky pas bisedës.
Ndërkohë, Presidenti francez Emmanuel Macron ka zhvilluar një bisedë të veçantë telefonike me Zelenskyn, duke dënuar sulmet e fundit të Rusisë dhe duke theksuar përkushtimin e Francës ndaj një zgjidhjeje diplomatike.
“Franca është e vendosur të punojë me të gjithë partnerët për të siguruar masa për uljen e tensioneve dhe për të imponuar një armëpushim,” deklaroi Macron, i cili konfirmoi se të hënën në Londër do të zhvillojë takime me Zelenskyn, Kryeministrin britanik Keir Starmer dhe Kancelarin gjerman Friedrich Merz, për të diskutuar hapat e mëtejshëm drejt paqes në Ukrainë.
