Policia e Lushnjës ka shoqëruar mbi 30 persona në kuadër të hetimeve për atentatin ndaj Julian Sulës, i njohur si “Juli i Pashakos”.
Burime nga grupi hetimor bëjnë me dije se pjesa më e madhe e të shoqëruarve janë anëtarë të grupit të Aldo Bares dhe fisit Aliçka, dy grupe të njohura në qytet që prej vitesh kanë pasur konflikte të shumta me 45-vjeçarin Sulo. Pas marrjes në pyetje, të gjithë janë liruar, pasi kanë mohuar përfshirjen në ngjarje.
Hetimet kanë zbuluar se automjeti i përdorur nga autorët ishte vjedhur në vitin 2022 në Greqi, ndërsa targat ishin vjedhur një vit më parë, po në Greqi, por në qytete të ndryshme. Autoritetet greke, në përgjigjet e dërguara Policisë së Fierit, kanë konfirmuar se bëhet fjalë për vjedhje pa autorë dhe ngjarje të pazbardhura.
Pas atentatit, autorët dogjën makinën në fshatin Lifaj. Grupi hetimor dyshon se ata janë larguar me një tjetër automjet, duke përdorur rrugë dytësore që kalojnë nëpër fshatra drejt Kuçovës dhe Beratit.
Megjithatë, kjo pistë mbetet e vështirë për t’u verifikuar, pasi zona ku mendohet të kenë kaluar është kryesisht tokë bujqësore dhe pa biznese, duke bërë që të mos ketë kamera sigurie që mund të kenë regjistruar lëvizjet e tyre.
