Departamenti i Sherifit të Qarkut të Los Anxhelosit ka nisur një hetim mbi akuzat e reja për sulm seksual ndaj reperit dhe producentit Sean “Diddy” Combs. Hetimi vjen pas një raporti nga policia në shtetin e Floridës, ku jeton viktima e supozuar.
Një zëdhënës i policisë së qytetit Largo, Florida, bëri me dije për ABC News se autoritetet kanë ofruar ndihmë Departamentit të Sherifit të Los Anxhelosit, por nuk po kryejnë një hetim të pavarur.
Raporti i policisë së Largos përmend një burrë që pretendon se Combs e sulmoi seksualisht në vitin 2020 dhe që ngriti padi në shtator.
Emri i viktimës u mbajt i fshehtë, por producenti muzikor Jonathan Hay zbuloi në mediat sociale se ai ishte ankuesi. Ai është gjithashtu një nga paditësit “John Doe” në një padi civile kundër Combs të ngritur në korrik.
Hay i ka ofruar policisë së Largos foto dhe video që sipas tij tregojnë bashkëpunimin me CJ Wallace në një projekt muzikor, që çoi në takimin me “Diddy”-n dhe incidentet e supozuara.
Ndërkohë, Wallace ka ngritur kundërpadi në Florida javën e kaluar, duke mohuar akuzat dhe duke i cilësuar ato pjesë të një “fushate të planifikuar shpifjeje” për të njollosur reputacionin e tij.
