Qeveria Rama ka prezantuar këtë të premte projektin për rijetëzimin e kullave–shtëpi në katër rajone të vendit, Lezhë, Shkodër, Dibër dhe Kukës.
Ky projekt i realizuar në bashkëpunim me GIZ-in gjerman, i cili sipas Ministrisë së Turizmit, synon zhvillimin ekonomik, kulturor dhe turistik të veriut të Shqipërisë, ngre shumë pikëpyetje dhe lë shumë hapësira diskutimi.
Kjo për faktin, se vetëm pak muaj më parë, qeveria rrafshoi qindra bujtina në Theth e Valbonë, të cilat ishin ndërtuar me investime private dhe që kishin shndërruar zonën në një prej destinacioneve më të suksesshme të turizmit malor në vend.
Rama çoi fadromat dhe brenda pak minutash rrëzoi godinat me molotov në pikun e sezonit turistik, duke llahtarisur turistë e banorë vendas. Pavarërisht kundërshtimit nga këta të fundit, Rama nuk e ndali zemërimin por u hoqi bukën e gojës të gjithë atyre që vetë u kishte bërë thirrje të ktheheshin në atdhe dhe të investonin në tokat e tyre.
Pra, e njëjta qeveri që shembi me fadroma bujtinat në pikun e sezonit turistik, shpall projektin për rijetëzimin e kullave-shtëpi me pretendimin se synon të zgjerojë potencialin e turizmit dhe të trashëgimisë në vend.
Paradoksi është i dukshëm, megjithatë ky është një tjetër rast që vërteton se mania e Ramës për kullat nuk paska të sosur.
Pasi pushtoi kryeqytetin me to, tashmë ja ka vënë syrin kullave të veriut, me pretendimin për ti rijetëzuar, edhe pse dukshëm është thjesht zhvatja e radhës që ka planifikuar tu bëjë taksave të qytetarëve shqiptarë.
Ana tjetër e medaljes së kullave
Departamenti i Shtetit (DASH) publikoi në mars të këtij viti raportin e Strategjisë së trafikut të drogës dhe pastrimit të parave.
Në pjesën për Shqipërinë, thuhej se, krimi shqiptar po i pastron paratë e drogës në ndërtimin e kullave dhe blerje të pasurive të paluajtshme në Tiranë dhe zonat të tjera.
Ndërkohë nga ana tjetër ekspertët dhe politologët thonë se Rama i përdor një pjesë të kullave si shpërblim për oligarkët, (ata financiarë, kriminalë dhe mediatikë). Sipas tyre Rama jep leje kullash shumëkatëshe me qindra mijëra hektarë për ndihmën që këta të fundit i japin sidomos në periudhë elektorale.
Nuk dihet se cilën nga dy rastet e sipërpërmendura ka në plan Rama me ‘rijetëzimin’ e kullave në veri, por në të dyja rastet, qytetarët shqiptarë janë ata që goditen dita-ditës nga kjo qeveri dhe detyrohen më pas të braktisin vendin.
