Mashtrimet financiare janë kthyer në një fenomen thuajse të përditshëm, sidomos me zhvillimin e teknologjisë online. Grupe personash, ose individë të aftë për të bindur viktimën e radhës, arrijnë të zhvasin mijëra euro nëpërmjet skemave të investimeve fiktive, që në fund rezultojnë të rreme. Kësaj here do të flasim për një formë më të thjeshtë, por tepër të lashtë të mashtrimit — atë të thyerjes së mirëbesimit, ku viktimë është Mevlan Amidi, një 32-vjeçar nga Gjilani, ndërsa “truri” i gjithçkaje është Klevi Alkollari, një i ri nga Korça.
Njohja e të dyve ndodhi në Zyrih të Zvicrës dhe më pas u kthye në një raport biznesi, ku Klevi i propozoi Mevlanit të blinin makina në Zvicër dhe t’i shisnin më shtrenjtë në Shqipëri. Paratë e investuara në biznes do të ndaheshin 50/50, po ashtu edhe fitimi. Në shitjen e parë, 32-vjeçari kosovar pranon se ka fituar para, edhe në të dytën — ndërsa për tre makina të tjera nuk ka fituar asgjë, duke humbur 15 mijë euro të investuara.
Lidhur me këtë skemë mashtrimi janë dëshmitarë edhe disa shokë të Mevlanit, të cilët kanë qenë prezentë në situata të ndryshme, madje kanë shërbyer edhe si persona që kanë bërë dërgesa parash në adresë të Klevit. Por 2-3 mijë euro nuk ishin asgjë për të riun nga Korça. Ai krijon një tjetër skemë mashtrimi, këtë herë me shifra më të mëdha. Klevi i garanton Mevlanit se paratë e tij ndodheshin në Shqipëri dhe se mund të zgjidhte t’i merrte, ose të investonte edhe 23 mijë euro të tjera, për të blerë një apartament në zonën e “Kodrës së Diellit” dhe më pas ta shisnin më shtrenjtë.
Këto 23 mijë euro Klevi Alkollari i ka marrë në dorë në Kosovë nga disa familjarë të Mevlanit dhe, në mirëbesim e sipër, nuk është bërë asnjë kontratë noteriale. Në lojë ishin 38 mijë euro të investuara nga Mevlani, i cili priste të merrte 70 mijë euro, gjysmën e shumës që do të vinte nga shitja e apartamentit. Por gjithçka ishte imagjinare — apartamenti nuk ekzistonte, ndërsa kontrata noteriale ishte false, e përpiluar nga vetë Klevi.
Kjo gjë u vërtetua edhe te noterja, firmat dhe vulat e së cilës ishin përdorur në dokumentin e falsifikuar.
Pasi kuptoi se kishte rënë pre e një mashtrimi, 32-vjeçari kosovar tentoi ta kontaktonte Klevin, por ky i fundit nisi sërish të përdorë skema mashtrimi për t’u zhdukur, duke i premtuar se do t’ia kthente paratë, ndërkohë që i paraqiste dokumente false. Edhe këto dokumente rezultuan joreale, gjë që u vërtetua në bankën përkatëse.
Ajo që bie në sy është fakti se Mevlani nuk është viktima e vetme e Klevit, por edhe një djalë tjetër nga Kosova, i quajtur Flamur. Për t’i shlyer një borxh prej 5.000 euro këtij të fundit, Klevi përdori paratë e Mevlanit, duke e çuar shifrën e borxhit ndaj tij në 45 mijë euro.
Kur u përball me gazetarin Freard Rista, 26-vjeçari korçar mohoi gjithçka — madje edhe veten e tij, duke deklaruar se nuk ishte ai personi që kërkohej. Më pas, i zënë ngushtë, pranoi borxhin ndaj Mevlanit, por deklaroi se gjithçka ia kishte shlyer.
Klevi pretendoi t’i paraqiste “Piranjave” disa fatura transferte, të cilat i përkisnin kohës kur biznesi mes dy ish-shokëve funksiononte mirë.
Por kur kuptoi që kjo ishte një lëvizje e kotë, ai ndryshoi sërish skemë: kontaktoi me Mevlanin duke e garantuar se do t’ia shlyente borxhin. Menjëherë pas telefonatës, i dërgoi 2.000 franga dhe më pas 872 të tjera, ndërkohë që pranë noterit firmosën një deklaratë për njohjen e borxhit total prej 42 mijë frangash. Lidhur me zotërinë e përmendur më sipër, me emrin Flamur, sipas Klevit, ai ka tentuar ta mashtrojë këtë të fundit, duke i kërkuar 5.000 euro për të detyruar emisionin të tërhiqej nga investigimi.
Por edhe kjo skemë mashtrimi u zbulua shpejt./Piranjat
