Ish-zv.kryeministri Arben Ahmetaj ka reaguar mbrëmjen e sotme pas deklaratave të kreut të SPAK, Altin Dumani, i cili gjatë raportimit në Kuvend e cilësoi atë person në kërkim ndërkombëtar për disa vepra penale.
Në një intervistë “live” në emisionin Çim Peka Live në Syri TV, Ahmetaj u shpreh ashpër ndaj kreut të Prokurorisë së Posaçme, duke e cilësuar si simbol të dështimit të Reformës në Drejtësi.
“E dyta, unë kam qenë në SPAK, Altin Dumani nuk ka guxuar të më bëjë asnjë pyetje. E ka marrë me zell dhe me dhunë çështjen time me urdhër politik, dhe erdhi aty ku unë isha thirrur në SPAK së bashku me avokatin tim, dhe nuk guxoi të më bëjë asnjë pyetje.
Për çfarë jam i mirëpritur unë, për të qenë bashkëpunëtor i kujt drejtësie? Për çfarë krimi? Dhe është interesante tani, praktikisht reforma në drejtësi ka si strumbullar një dështim, dhe Altin Dumani është pronari i dështimit i reformës në drejtësi, për shkak jo më të dy standardeve, por standarde sipas qejfit dhe urdhrit politik. Kush është armik i Ramës, arrestohet duke u tërhequr zvarrë në rrugë,” tha Ahmetaj.
Deklarata e tij vjen pas fjalës së Dumanit në Kuvend, ku ky i fundit tha se Ahmetaj është shpallur në kërkim ndërkombëtar dhe se “në çdo moment që një subjekt dëshiron të bëhet bashkëpunëtor i drejtësisë, është mëse i mirëpritur”.
Kujtojmë se Arben Ahmetaj akuzohet për korrupsion dhe pastrim parash në lidhje me aferën e inceneratorëve dhe ndodhet jashtë vendit që prej vitit 2023.
