Një skandal ka përfshirë NBA-në, pasi një trajner dhe një lojtar i njohur janë arrestuar për përfshirje në një rast të paligjshëm bastesh sportive, raportoi CBS News, partneri amerikan i BBC-së.
Trajneri i Portland Trail Blazers, Chauncey Billups, dhe lojtari i Miami Heat, Terry Rozier, u arrestuan pas ndeshjeve të së mërkurës.
Hetimet federale kanë nisur pas zbulimit të një aktiviteti të dyshimtë bastesh që lidhej me një ndeshje të marsit 2023, ku Rozier, në atë kohë lojtar i Charlotte Hornets, kishte performuar ndryshe nga zakonisht.
Sipas raportimeve të CBS, autoritetet po shqyrtojnë nëse lojtari ka manipuluar qëllimisht lojën për të përfituar nga një skemë e paligjshme bastesh sportive.
Në atë ndeshje kundër New Orleans Pelicans, Rozier luajti vetëm nëntë minuta dhe shënoi pesë pikë, duke u justifikuar me dhimbje në këmbën e djathtë.
Para këtij takimi, ai kishte një mesatare prej 35 minutash dhe 21 pikësh për ndeshje, çka e bën performancën e tij të pazakontë.
