Deputeti i PD-së, Ivi Kaso, në një postim në rrjetet sociale është shprehur se ngjarja tragjike që ndodhi sot në Maliq është dëshmi e një shteti të dështuar, që kujtohet për qytetarët vetëm pasi ndodh fatkeqësia.
Kaso vë theksin tek braktisja e plotë e shtresave më të pambrojtura nga një sistem që, prej 13 vitesh, nuk funksionon për ata që kanë nevojë.
“Një familje në skaj të mbijetesës goditet rëndë, ndërsa shteti dhe bashkia bëhen të gjallë vetëm kur ndodh tragjedia”, shprehet deputeti demokrat.
Postimi i Kasos:
Të dashur miq!
Ngjarja e sotme në Maliq është nga ato ngjarje që askush nuk do të dëshironte t’i dëgjonte.
Një familje në skaj të mbijetesës, pëson dhe një goditje tejet të rëndë.
Për fat të keq, shteti dhe bashkia kujtohet për këto kategori familjesh vetëm pasi iu ndodhin fatkeqësi apo tragjedi.
Ky sistem që është instaluar tani e 13 vjet, nuk ka sy e veshë për ata që kanë nevojë por vetëm për ata që i sigurojnë jetëgjatësinë. Lutjet tona sot shkojnë për familjen Azisllari dhe vajzën e mitur që po lufton për jetën në spital!
