Një ngjarje e rëndë ka ndodhur mesditën e së dielës në qytetin e Maliqit, ku një banesë është përfshirë nga flakët, ndërsa brenda saj ndodheshin një nënë dhe dy fëmijët e saj të mitur.
Të tre personat u nxorën nga banesa dhe u transportuan në spital, por fatkeqësisht 40-vjeçarja Merjeme Azizllari dhe djali i saj 14-vjeçar, Luka Azizllari, nuk mundën t’u mbijetonin plagëve të shkaktuara nga asfiksia dhe ndërruan jetë, ndërsa vajza e mitur 6-vjeçare është në spital në gjendje kritike.
Vajza është dërguar në repartin e djegieve në QSUT ndërsa sipas mjekëve gjendja e saj vijon të jetë e rëndë pasi krahas asfiksisë që pësoi nga tymi ka dhe shumë djegie.
Sipas informacioneve, zjarri dyshohet se ka rënë si pasojë e një sobe me dru që familja përdorte për ngrohje. Flakët kanë shpërthyer rreth orës 13:30 në banesën ku ndodheshin 40-vjeçarja Merjeme Azizllari dhe dy fëmijët e saj.
Njoftimi i policisë:
Rreth orës 13:30, në bllokun nr. 3, Maliq, ka rënë zjarr në banesën e shtetasit V. A.
Si pasojë janë dëmtuar dhe janë dërguar menjëherë për ndihmë shëndetësore në spital shtetasja M. A. dhe dy fëmijët e saj të mitur, 14 dhe 6 vjeç.
Dyshohet se si pasojë e asfiksisë shtetasja M. A., ka ndërruar jetë në spital.
Një komshi i familjes Azizllari ka dhënë detaje mbi ngjarjen e rëndë, sipas dëshmisë së fqinjit, fëmijët ishin me spektrin e autizmit dhe familja përballej prej kohësh me kushte të vështira ekonomike.
“Fëmijët me autizëm, nëna ishte mirë. Nëna nuk punonte, vetëm i ati punonte në familje. Ishin në kushte të vështira ekonomike. Nuk di se si ka ndodhur ngjarja. Tani më thanë një familjar. Erdha të pyes se sa pashë zjarrfikësen”, u shpreh fqinji.
Një tjetër fqinje, Benereta Pashollari, tregoi se familja jetonte në kushte të vështira ekonomike dhe se nëna përpiqej të kujdesej për dy fëmijët, të cilët ishin me spektrin autik.
“Familje punëtore, ishin me ekonomi të dobët. Babai i fëmijëve punonte, ajo mbante dy fëmijët, i ushqente me aq sa kishte mundësi. Bashkia i ndihmonte çdo muaj plus që merrnin dhe ushqime dhe ndihmë ekonomike.
Vajza ishte më e vogël se djali, djali në këmbë, vajza nuk lëvizte dhe aq. Nëna nuk kujdesej shumë për fëmijët. Ne të lagjes i flisnim, i thoshim “laji, shpëlaji”. E ndihmonim, çdo gjë i çonim. Si binte në qafë askujt. Të dy fëmijët ishin autikë”, tregoi ajo.
Sipas dëshmive të saj vajza arriti të shpëtonte vetëm falë ndërhyrjes së një gruaje që ndodhej pranë banesës dhe e pa atë duke kërkuar ndihmë. Ajo ishte hedhur nga dritarja, ndërsa nëna dhe vëllai i saj nuk arritën të dilnin në kohë për shkak të tymit të dendur.
