Një 85-vjeçar ka mbetur i plagosur këtë të shtunë në lagjen “Livadhë” të Himarës, pasi teksa punonte në tokën e tij ka shpërthyer një granatë dore.
Sipas policisë, mjeti shpërthyes ishte i fshehur në rrënjët e një ulliri dhe ka shpërthyer në momentin që i moshuari po punonte në atë zonë. Si pasojë e shpërthimit, ai ka marrë dëmtime në këmbë.
I plagosuri, me inicialet K.K., është transportuar në Spitalin Rajonal të Vlorës, ku ndodhet jashtë rrezikut për jetën.
“Sot, në lagjen “Livadhë”, Himarë, në një sipërfaqe toke (ullishte), shtetasi K. K., 85 vjeç, duke punuar në tokën e tij, ka marrë dëmtime në këmbë, si pasojë e shpërthimit të një granate dore, e cila ndodhej e fshehur në rrënjët e një ulliri.
Shtetasi K. K. aktualisht ndodhet në Spitalin Rajonal Vlorë, jashtë rrezikut për jetën.
Grupi hetimor po kryen veprimet hetimore për zbardhjen dhe dokumentimin e plotë të ngjarjes.”, njofton policia.
