Presidenti i SHBA, Donald Trump, ka konfirmuar se do të takohet me homologun kinez, Xi Jinping, gjatë samitit të Bashkëpunimit Ekonomik Azi-Paqësor (APEC) në Korenë e Jugut, brenda dy javësh. Deklarata u bë gjatë një interviste për Fox News, e cila do të transmetohet të dielën më 19 tetor.
Trump pritet të udhëtojë më 29 tetor për një vizitë dyditore, ndërsa samiti i APEC do të zhvillohet deri më 1 nëntor. Javën e kaluar ai kishte kërcënuar të anulonte takimin, por Sekretari i Thesarit të SHBA konfirmoi se gjithçka do të zhvillohet sipas planit.
Takimi vjen në një moment tensioni të lartë tregtar mes Uashingtonit dhe Pekinit, kryesisht për shkak të tarifave dhe kontrolleve kineze mbi eksportet e mineraleve të rralla. Trump ka paralajmëruar vendosjen e tarifave shtesë prej 100% për produktet kineze në përgjigje të këtyre masave.
