Jared Kushner dhe Ivanka Trump kanë dhënë mesazhe të fuqishme në shpresë për paqe në Lindjen e Mesme.
Të pranishëm në aktivitetin e organizuar nga Witkoff, ata folën për rëndësinë e arritjes së armëpushimit dhe kthimit të pengjeve.
Jared Kushner, dhëndri i presidentit amerikan Donald Trump, deklaroi se ndihet krenar për miqësinë me Izraelin.
“Nuk mund të ndihem më krenar që jam mik i Izraelit”, u shpreh ai, duke falënderuar “ushtarët e mrekullueshëm të IDF-së” për angazhimin e tyre.
Duke iu referuar negociatave të vështira që çuan në arritjen e një marrëveshjeje për armëpushim, Kushner përdori humorin. “Vura re që Uitkoff nuk përdori asnjë fjalë me katër shkronja në fjalimin e tij, ndoshta sepse i kishte përdorur të gjitha gjatë negociatave”.
Ivanka Trump, në vijim të fjalës së bashkëshortit të saj, theksoi se kthimi i çdo pengu është një “triumf i besimit, i guximit të përbashkët”.
Ajo shtoi se lutet që java në vazhdim të jetë një kohë shërimi për të gjithë dhe shprehu shpresën për një paqe të qëndrueshme në rajon.
“Shpresojmë që kapitulli i ardhshëm të jetë një paqe e qëndrueshme dhe e gjatë. Zoti ju bekoftë për qëndrimin tuaj të bashkuar në këtë kohë të errët”, tha Ivanka Trump.
Ngjarja u përmbyll mes duartrokitjeve dhe thirrjeve nga turma në mbështetje të familjes Trump.
