Policia e Tiranës ka goditur një grup kriminal që rekrutonte vajza nga vendet e Amerikës Latine e Azia Qendrore dhe i detyronin të ushtronin prostitucion në Shqipëri.
Në Shqipëri u vunë në pranga: Assel Adrysheva, Rostyslav Mieshkov, Denis Berisha, Mirel Shperdheja, Dritan Sukaj, Ilmar Gugashi dhe Kejvin Ndreu. Ndërkohë, u shpallen në kërkim 2 shtetas të tjerë, pjesëtarë të grupit kriminal.
Grupi kriminal e kishte bazën në një hotel mes kryeqytetit pranë zonës së njohur si”Tregu Çam”.
Koka e grupit kriminal të trafikut të qenieve njerëzore në Shqipëri është kolumbiani Lukas Giraldo Bentacur, ndërsa babai i tij Giraldo Bentacur është koka e grupit për gjithë Europën. Ai drejtonte disa rrjete prostitucioni në shumë vende të Europës dhe njihet si një nga personazhet më të njohur të krimit në Kolumbi.
Për arrestimin e Lukas Bentacur në Kolumbi kanë shkuar edhe oficerë nga Policia shqiptare. Një grup nga policia shqiptare zv. Drejtori i Policisë së Tiranës dhe shefi i sektorit kundër trafiqeve dhe narkotikëve dhe prokurori i çështjes ndodhen në Medelin pasi morën pjesë në finalizimin e operacionit.
- Operacioni në Kolumbi
Policia Kombëtare e Kolumbisë, në një operacion të koordinuar me Prokurorinë e Përgjithshme të Shtetit dhe agjenci ndërkombëtare si Europol, ka goditur një strukturë të fuqishme kriminale transnacionale të njohur si “RAPHAX”, e cila merrej me trafikimin e qenieve njerëzore për qëllime shfrytëzimi seksual në Evropë Operacioni u realizua përmes kontrolleve të njëkohshme në disa qytete të vendit.
Si rezultat i ofensivës policore, u ekzekutuan 12 urdhër-arreste në qytetet Medellín (9), Pereira (2) dhe Cali (1) ndaj anëtarëve të kësaj rrjete kriminale.
Të gjithë të ndaluarit do të përballen me akuza për trafikim personash për qëllime shfrytëzimi seksual dhe pjesëmarrje në grup kriminal të strukturuar.
- Rekrutimi i 60 viktimave dhe rruga e shfrytëzimit
Hetimet zbuluan se grupi kriminal “RAPHAX” kishte rekrutuar më shumë se 60 viktima në qytetet Medellín dhe Cali. Viktimat dërgoheshin në një rrjet shfrytëzimi që operonte në disa vende evropiane, përfshirë Shqipërinë, Malin e Zi, Maltën, Kroacinë dhe Kosovën.
Pasi mbërrinin në Evropë, viktimat vendoseshin në kushte të ngjashme me skllavërinë moderne.
Shfrytëzuesit u vendosnin një borxh fillestar prej 5 mijë eurosh për udhëtimin dhe akomodimin, i cili në praktikë bëhej i pamundur për t’u shlyer, pasi të ardhurat e tyre mbaheshin nga rrjeti dhe ndaj tyre vendoseshin gjoba të vazhdueshme.
Grupi në Kolumbi i rekrutonte vajzat duke u premtuar që do i çonin në Shqipëri për punësim me paga të larta dhe duke ia paraqitur Shqipërinë si një ishull të bukur ku do të punonin në turizëm. Kur vinin në vendin tonë i gjenin edhe banesat dhe më pas lidhjet e grupit këtu i detyronin të prostituonin.
Në rastet kur vajzat nuk i dërgonin lekët, pjesëtarë të grupit kriminal shkonin në banesat e familjarëve të tyre dhe i kërcënonin me jetë.
- Si funksiononte grupi kriminal në Shqipëri
Kolumbiani Lucas Betankur kishte rolin kryesor në rekrutimin e vajzave nga vendet e Amerikës Latine dhe organizimin e udhëtimit dhe akomodimit të tyre në Shqipëri, ku më pas detyroheshin të ushtronin prostitucion. Ndërkohë, Denis Berisha, bashkëpunonte me organizatorin kolumbian duke siguruar kushtet logjistike për akomodimin dhe menaxhimin e rrjetit.
Një nga të arrestuarit, shtetasi me iniciale K. P., mblidhte të ardhurat e përfituara nga aktiviteti kriminal dhe i transferonte ato nëpërmjet kriptovalutave, në llogaritë e 25-vjeçarit kolumbian.
Një nga të arrestuarit, 35 vjeçari Ilmar Gugashi, kishte përshtatur një hotel në rrugën “Reshit Collaku”, në Tiranë, duke e shndërruar në vend për ushtrim prostitucioni nga vajzat e trafikuara. Ndërkohë, Denis Berisha sigurohej për shpërndarjen e lëndëve narkotike për disa nga vajzat dhe lehtësonte kontaktet me klientët.
