Një ngjarje e rëndë ka tronditur qytetin e Mynihut në orët e para të mëngjesit të së mërkurës, ku shpërthime të fuqishme dhe të shtëna me armë zjarri u dëgjuan në veri të qytetit.
Sipas raportimeve paraprake të mediave gjermane, një person ka humbur jetën dhe të paktën një tjetër është plagosur rëndë. Autoritetet dyshojnë se autori i ngjarjes ka mbushur me eksploziv banesën e prindërve të tij, i ka vënë flakën dhe më pas ka kryer vetëvrasje.
Incidenti ndodhi në zonën Lerchenauer Straße, ku tymi i dendur u pa që nga kilometrat e largët. Policia ka izoluar një perimetër të gjerë sigurie, ndërsa banorët janë paralajmëruar të shmangin zonën. Trafiku në pjesën veriore të qytetit është pezulluar, duke shkaktuar bllokime të shumta.
Në vendngjarje ndodhen forca speciale, zjarrfikës, ekspertë piroteknikë dhe hetues kriminalë. Shefi i policisë, Thomas Schelshorn, deklaroi për mediat se “nuk ka rrezik për popullsinë” dhe se ngjarja “nuk ka lidhje me Oktoberfest-in”, festivalin tradicional që zhvillohet aktualisht në Mynih.
