Shërbimi i Inteligjencës Ushtarake të Ukrainës (HUR) njoftoi se më 27 shtator, gjatë një operacioni special në Kaukazin Verior, u vra një oficer i lartë i Gardës Kombëtare Ruse së bashku me dy pjesëtarë të tjerë të shërbimit.
Sipas njoftimit të agjencisë të publikuar më 30 shtator, nënkoloneli, ndihmësi i tij dhe shoferi u vranë pranë fshatit Tambukan në rajonin e Stavropolit në Rusi, teksa po udhëtonin drejt një poligoni ushtarak.
HUR publikoi gjithashtu një video si provë, ku shihet oficeri rus nga larg dhe më pas një shpërthim që godet automjetin e tij në lëvizje, raporton kyivindependent.
Oficeri i vrarë është identifikuar si komandant i njësisë “Avangard” të Gardës Kombëtare Ruse. Kjo njësi është përgjegjëse për ruajtjen e rendit publik dhe luftën kundër “terrorizmit” dhe “grupeve të armatosura ilegale”.
Operacioni, sipas HUR-it, u zhvillua me mbështetjen e një grupi të quajtur “Lëvizja Çlirimtare e Kaukazit”, por nuk janë dhënë detaje të mëtejshme. Shërbimet ukrainase të inteligjencës dhe sigurisë janë lidhur edhe më parë me atentate ndaj oficerëve ushtarakë rusë larg vijës së frontit, që nga fillimi i pushtimit në vitin 2022.
Fshati Tambukan ndodhet në jugperëndim të Rusisë, rreth 80 kilometra në veri të kufirit me Gjeorgjinë dhe rreth 650 kilometra nga vija më e afërt e frontit në Ukrainë.
Kaukazi Verior është i njohur si një nga rajonet më të paqëndrueshme të Rusisë, me një histori të gjatë kryengritjesh, radikalizmi dhe tensioneve etnike.
