Ish-deputeti demokrat Lefter Maliqi ka reaguar ndaj zërave se Partia Demokratike nuk ka ende një kandidat përballë Ogerta Manastirliut në garën për Bashkinë e Tiranës, duke i cilësuar si propagandë të rilindjes.
Sipas tij, opozita ka disa emra potencialë dhe po zhvillon negociata për të arritur një konsensus me partitë e tjera.
“Shqiptarët të mos e hanë këtë aktrim dhe propagandë të rilindjes që PD nuk ka kandidatë. Kandidatë ka, negociatat bëhen për të rakorduar edhe tek emri. Për mua, emri mund të jetë zgjedhur,” u shpreh Maliqi, duke shtuar se opozita përballet me një “narkoshtet” dhe se është e domosdoshme bashkëpunimi me partitë e tjera për një emër të përbashkët.
Ai përmendi emra të përfolur si Ilir Alimehmeti dhe Jorida Tabaku, duke theksuar se gara për Bashkinë e Tiranës është ndryshe nga zgjedhjet e përgjithshme, ku sipas tij, balanca është më e barabartë.
Maliqi kërkoi riorganizim urgjent të PD-së në bazë, duke apeluar që drejtuesit politik që kanë humbur zgjedhjet të japin dorëheqje. “Pa bazë nuk ka fitore. Duhet t’u hapet rruga njerëzve të përkushtuar,” tha ai, duke akuzuar kryeministrin Rama për një stil drejtimi autoritar: “Rama nuk lëshon pe, nuk fal. Nuk është Fatos Nano, është në vijën e një diktature.”
