Atletico Madrid ka arritur të marrë një fitore të madhe në stadiumin e saj, në derbin ndaj Real Madrid, në një ndeshje të çmendur me dy përmbysjesh rezultatesh, e vlefshme për javën e shtatë të La Liga-s.
“Los Rijoblancos” e kthyen disavantazhin 1:2, për të fituar në fund me rezultat të thellë 5:2 duke shokuar të gjithë në “Wanda Metripolitano”.
Fillimisht, ishte Robin le Normand, i cili në minutën e ’15 të takimit shënoi me kokë për ta zhbllokuar rezultatin dhe duke i dhënë epërsinë vendasve.
Më pas, Real Madridi mori dominimin për të barazuar fillimisht me Kylian Mbappen, i cili shënoi nga një pozitë jo e favorshme pas asistimit të Arda Guler, në minutën e ’25 të takimit. Ndërsa, përmbysja momentale e rezultatit do të vinte në minutën e ’37 të takimit, ku ishte radha e Arda Guler, i cili shënoi pas asistimit të Vini Jr.
Pavarësisht pësimit të dy golave, Atletico Madrid nuk u dorëzua dhe arriti të shënonte menjëherë me anë të Clement Lenglet, por goli i francezit u anulua për shkak se e kishte prekur me dorë.
Ndërkohë, kur askush s’e priste, në skenë doli Alexander Sorloth që realizoi nga afërsia pas harkimit të Koke për ta barazuar rezultatin në 2-2, në minutën e ’45+3 të takimit.
Atletico ishte më e mirë në pjesën e dytë dhe më kërkuese, derisa arriti të gjejë dy herë rrugën e rrjetës. Julian Alvarez e përmbysi epërsinë me një gol nga penalltia pasi Guler kishte bërë një ndërhyrje brenda zonës, në minutën e ’50 të takimit. Argjentinasi më pas doli sërish në skenë për ta vulosur fitoren, këtë herë me një eurogol nga gjuajtja e lirë, në minutën e ’64.
Në fund, Atletico krijoi edhe një kundëraksion, ku Antoine Griezmann e konfirmoi turpërimin e Realit dhe epilogun përfundimtar prej 5-2.
Reali kështu shijon humbjen e parë këtë sezon në La Liga, por mbetet lider me 18 pikë ndërsa Atletico ngjitët në vendin e katërt me 12 pikë.
