Në një lagje në qendër të Sukthit, prej vitesh banorët përballen me një problematikë e cila po u rrezikon shëndetin.
Kanali i ujërave të zeza, rreth 200 metra i gjatë, qëndron i hapur prej shumë vitesh, duke qenë një vatër infeksionesh për mijëra banorë të zonës.
Aroma e pakëndshme dhe mbeturinat e hedhura pa kriter janë bërë pjesë e përditshmërisë së tyre. Në këtë zonë banojnë rreth 10 mijë banorë dhe 400 nxënës shkolle, të cilët një pjesë të kohës e kalojnë duke luajtur në lagje. Përveç kanalit të ujërave të zeza, banorët ngrenë shqetësimin edhe për mbeturinat, që sipas tyre nuk pastrohen.
“Kshu ka qenë ky, na krijon shqetësim për fëmijët shumë, se mblidhen minjtë, plehrat janë shumë keq. Këtu mblidhen fëmijët, rrinë në drekë, dhe fëmijët marrin erën e keqe.” – shprehet një banore.
“Ky kanal ka 10-15 vjet kështu, na shqetëson për fëmijët, miu që del, plehrat.” – shprehet një banore tjetër.
“Ky këtu po, duhet mbyllur, se është rrugë kalimi. Kemi bërë ankesë në bashki, po ‘do e bëjmë’ thonë ato, po kur do bëhet, nuk i dihet.” – shprehet një banor.
Banorët e kësaj lagjeje presin prej vitesh një zgjidhje për këtë problematikë, që sipas tyre është kthyer në burim ndotjeje dhe rreziku të përhershëm për shëndetin e tyre. Ata i bëjnë apel institucioneve për masa urgjente./ Euronews Albania
