Presidenti Bajram Begaj ka hapur zyrtarisht derën për importin masiv të punëtorëve, studentëve dhe emigrantëve nga Bangladeshi në një takim me Këshilltarin Kryesor të Bangladeshit, Muhammad Yunus gjatë vizitës në Nju Jork, ku mori pjesë në Asamblenë e OKB.
Begaj duket se ka zbatuar një porosi të kryeministrit Edi Rama, i cili nuk e ka fshehur vizionin e hershëm për të zëvëndësuar shqiptarët e larguar nga vendi me punëtorë bangladeshas, që siç është shprehur Rama “nuk dinë shqip dhe nuk merren me thashetheme”.
Siç citohet nga mediat e huaja, Begaj është shprehur në takim se: “Ne kemi nevojë për punëtorë për vendin tonë, dhe disa kompani shqiptare kanë paraqitur tashmë aplikime për të punësuar nga Bangladeshi”.
Shqetësimit të Yunus se qytetarët e Bangladeshit duhet të udhëtojnë deri në New Delhi për të marrë një vizë në Shqipëri, Begaj iu përgjigj me propozimin për ta lehtësuar udhëtimin në vendin tonë përmes vizave dixhitale.
Por Begaj nuk u mjaftua me kaq. Sipas mediave të huaja, ai është ofruar në takim edhe për të pritur studentë nga Bangladeshi.
“Presidenti Begaj njoftoi më tej se universitetet shqiptare janë të hapura për të regjistruar studentë nga Bangladeshi përmes programeve ekzistuese të arsimit ndërkombëtar, duke shënuar një mundësi tjetër për thellimin e bashkëpunimit mes dy vendeve” raportojnë mediat e vendit me më shumë se 175 milionë banorë.
Aktualisht, Bangladeshi është ndër 6 vendet që dërgojnë më shumë emigrantë në botë, kryesisht për shkak të varfërisë që ekziston në këtë vend.
Shifrat e emigracionit dhe punësimi i të huajve në Shqipëri
Të dhënat tregojnë se aktualisht Shqipëria është një nga 10 vendet me tkurrjen më të madhe të popullsisë në botë.
Banka Botërore raporton se në vitin 2024 popullsia u zvogëlua me -1.15%, ndërsa INSTAT shënon se më 1 janar 2025 vendi kishte 2 milion e 363 mijë e 314 banorë, një rënie prej 1,2% krahasuar me një vit më parë.
Censi i vitit 2023 tregoi se në një dekadë popullsia është pakësuar me 400 mijë banorë, duke mbajtur rekord negativ në Europë.
Në këtë boshllëk, bizneset kanë kërkuar gjithnjë e më shumë punëtorë të huaj. Vetëm në sezonin turistik qershor–shtator 2024 u punësuan 6.906 shtetas të huaj në turizëm, që përbëjnë 55% të totalit të punonjësve të huaj.
Për gjithë vitin 2024, Agjencia Kombëtare e Punësimit dhe Aftësive miratoi 12.654 Leje Unike, një rritje prej 29% krahasuar me 2023 dhe trefishim krahasuar me 2018. Megjithatë, pesha e tyre mbetet e ulët: punëtorët e huaj zënë vetëm 2,2% të totalit të të punësuarve në vend.
