Apeli i Posaçëm la në fuqi vendimin e GJKKO-së për masën e sigurisë “arrest në burg” për Denis Bajrin, i cili u ekstradua në korrik nga Emiratet e Bashkuara Arabe për llogari të Prokurorisë së Posaçme.
Bajri akuzohet për vrasjen e Gjin Ndojit (Boriçi), e ndodhur më 9 gusht 2020 në Vau Dejës. Sipas hetimeve, ngjarja u organizua nga i zhdukuri Ervis Martinaj, i njohur si “mbreti i kumarit”, pasi viktima po i konkuronte në fushën e lojërave të fatit. Bajri u arrestua më 27 shkurt 2024 në Emiratet e Bashkuara Arabe.
Ai përballet me akuza të rënda, duke përfshirë vrasjen me paramendim në bashkëpunim me grup të strukturuar kriminal, prodhim dhe mbajtje pa leje të armëve, si dhe sigurimin e mjeteve për kryerjen e vrasjes.
Nga komunikimet e zbardhura në aplikacionin “SkyECC”, rezulton se vrasja ishte planifikuar nga Behar Bajri, ndërsa Denis Bajri ka kryer ekzekutimin. Përmes përgjimeve, autoritetet kanë arritur të konfirmojnë mesazhet që lidhin Bajrin me momentin e ngjarjes.
