Një shpërthim me lëndë plasëse është regjistruar në Kamëz pak pas mesnatës së sotme. Ngjarja ka ndodhur rreth orës 00:55, në murin rrethues të banesës së deputetit të Partisë Demokratike, Xhelal Mziu, në rrugën “Arjan Sala”.
Si pasojë e shpërthimit fatmirësisht nuk ka pasur të lënduar, por janë shkaktuar vetëm dëme materiale.
“Kamëz/Informacion paraprak Rreth orës 00:55, dyshohet se në rrugën “Arjan Sala”, në murin rrethues të banesës së shtetasit Xh. M., është vendosur një sasi e dyshuar lënde plasëse. Si pasojë e shpërthimit janë shkaktuar vetëm dëme materiale.
Grupi hetimor po punon për identifikimin dhe kapjen e autorit, si dhe për sqarimin e plotë të rrethanave të ngjarjes.”, njofton policia.
- Çfarë deklaron Xhelal Mziu
Xhelal Mziu ka dhënë dëshminë e tij për hetuesit ku është shprehur se nuk ka asnjë konflikt personal dhe nuk dyshon tek asnjë person konkret që mund të qëndrojë pas ngjarjes.
Në momentin e shpërthimit, në banesë ndodhej vetëm deputeti dhe bashkëshortja e tij. Për fat të mirë, askush nuk është lënduar, ndërsa dëmet janë vetëm materiale.
Nga hetimet paraprake të policisë, dyshohet se ngjarja është një mesazh, pasi sasia e lëndës plasëse ka qenë relativisht e vogël dhe është vendosur në pjesën e sipërme të murit rrethues të banesës.
Ndërkohë, kamerat e sigurisë në banesën e Mziut kanë qenë të fikura prej 3 ditësh.
Autoritetet janë duke shqyrtuar pamje nga kamerat e sigurisë të fqinjëve si dhe po marrin dëshmi nga banorët e zonës për çdo lëvizje të dyshimtë para apo pas shpërthimit.
Momenti i shpërthimit:
