Ish-zëvendës drejtori i Policisë së Durrësit, ka dhënë dëshminë e tij në gjyq, lidhur me atentatin ndaj ish-prokurorit Arjan Ndoja në vitin 2019.
Dëshmitari u pyet nga prokurori Adnan Xholi, nëse aktualisht është i punësuar dhe çfarë posti mban. Deliallisi thekson se ka marrë pjesë në arrestimin e Ramazan Rrajës, një emër i njohur për drejtësinë shqiptare.
Prokurori: Mund të na thoni jeni i punësuar apo jo?
Deliallisi: Jam zv.drejtor për hetimin e krimeve në Durrës. Kam marrë pjesë në operacionin për arrestimin e Ramazan Rrajës.
I pyetur nga prokurori se çfarë ka rezultuar gjate operacionit, Deliallisi u shpreh: “Kemi bërë ndërhyrje në zonën e fushë Krujës. Gjate ndërhyrjes kemi qenë 30 forca hymë brenda, u konstatuan 2 persona të armatosur. Ramazan Rraja dhe një tjetër nuk me kujtohet emri, por ishte në kërkim nga Policia e Elbasanit”.
Plaurent Dervishi, i cili akuzohet për organizmin e atentatit ndaj prokurorit Ndoja, iu drejtua dëshmitarit me fjalët: “Kam hall se mos mërzitet Visi që ke ardhur ne gjyq”.
Në këtë moment, ka ndërhyrë gjykata duke i tërhequr vëmendjen Dervishit.
Ndërkaq, SPAK pretendon se Ramazan Rraja, bashkë me kushëririn e tij dhe persona të tjerë kanë organizuar atentatit ndaj prokurorit Arian Ndoja më 1 nëntor 2019. Në atentat mbeti i vrarë shoferi Andi Maloku, dhe u plagos Landi Muharremi “Rrumi i Shijakut” dhe ish-prokurori i Durrësit, Arjan Ndoja.
