Një ngjarje e rëndë ka ndodhur sot në zonën malore të Kelmendit në Shkodër, ku një 40-vjeçar ka humbur jetën në rrethana ende të paqarta.
Viktima, identifikuar si M. Ç., banues në fshatin Fushë-Grudë, dyshohet se ka rënë aksidentalisht në një humnerë teksa po ecte në një terren të thepisur malor.
Ngjarja ka ndodhur rreth orës 09:15 në vendin e quajtur “Kozhnje”, një zonë e njohur për relievin e saj të vështirë dhe të rrezikshëm. Sipas njoftimit paraprak të Policisë së Shkodrës, dyshohet se 40-vjeçari ka rrëshqitur nga një lartësi e madhe, duke pësuar dëmtime fatale.
Gjithsesi rrethanat dhe shkaqet e këtij aksidenti mbeten të panjohura, ashtu sikurse arsyeja përse po ecte në një terren të rrezikshëm malor.
Njoftimi:
“Rreth orës 09:15, Salla Operative ka marrë njoftim se në njësinë administrative Kelmend, në vendin e quajtur “Kozhnje”, shtetasi M. Ç., 40 vjeç, banues në fshatin Grudë Fushë, dyshohet se ka qenë duke ecur në një terren të thepisur malor dyshohet se është rrezuar nga lartësia dhe si pasojë ka humbur jetën”, bëri me dije policia vendore për dinamikën paraprake të ngjarjes.
