Bashkia e Tiranës vazhdon me avazet e punimeve, që zgjasin me muaj të tërë. Në një video të mbërritur në redaksinë e Boldnews.al, shihet trotuari para Pallatit me Shigjeta, ku po kryhen punime që e kanë shndërruar kalimin në një sfidë për këmbët dhe trupin e qytetarëve.
Në një pjesë të trotuarit mungojnë pllakat e betonit duke e bërë ecjen një mini-aventurë urbane, ku çdo hap mund të shoqërohet me një “oh!” apo “ah!”.
Qytetarët duhet të kalojnë rrugën si në një kurs akrobatik urban, ndërsa Bashkia ofron adrenalinë falas për këdo që guxon të kalojë.
Ndërkohë personat të cilët lëvizin me biçikletë, ose skuter bëjnë mirë ta mendojnë dy herë nëse do ju duhet të kalojnë nga kjo rrugë, pasi përveçse mungon korsia e posaçme, edhe trotuari kërkon të jesh fans i sporteve ekstreme.
