Presidenti amerikan Donald Trump do të presë sot për një darkë zyrtare kryeministrin e Katarit, Mohammed bin Abdulrahman Al Thani, në resortin e tij të golfit në New Jersey, bëri të ditur Shtëpia e Bardhë.
Takimi vjen vetëm tre ditë pas një sulmi ajror të paprecedentë nga Izraeli ndaj drejtuesve të lartë të lëvizjes palestineze Hamas, gjatë një takimi të tyre në një kompleks banimi në kryeqytetin e Katarit, Doha.
Në darkë do të marrë pjesë edhe i dërguari i posaçëm i SHBA-së, Steve Whitkoff, i cili do të bashkohet me Trump dhe Al Thani për të diskutuar zhvillimet e fundit në rajon.
Tensionet pas sulmit në Doha
Kryeministri i Katarit dënoi ashpër sulmin izraelit, duke deklaruar të mërkurën se kryeministri izraelit Benjamin Netanyahu është ai që duhet të përballet me drejtësinë ndërkombëtare.
“Besoj se ajo që bëri Netanyahu dje ishte të vriste çdo shpresë për lirimin e pengjeve që ndodhen ende në Gaza,” deklaroi Al Thani në një intervistë për CNN, duke kritikuar ashpër veprimin izraelit ndaj delegacionit të Hamasit që ndodhej në Katar për negociata.
Përfshirja e diplomacisë amerikane
Përpara takimit me Trump, Sekretari amerikan i Shtetit, Marco Rubio, zhvilloi një bisedë telefonike me liderin e Katarit, ku temë kryesore ishin zhvillimet e fundit në Lindjen e Mesme dhe tensionet e ngritura mes Izraelit dhe Hamasit.
Takimi mes Trump dhe Al Thani pritet të jetë një moment kyç diplomatik, në një kohë kur roli i Katarit si ndërmjetës në çështjen e pengjeve dhe konfliktin Izrael–Hamas mbetet thelbësor.
