Nga momenti në moment, kryeministri Edi Rama pritet të mbërrijë në Presidencë, ku do të kërkojë nga presidenti Bajram Begaj mandatimin e qeverisë së re.
Kjo u konfirmua përmes një komunikate për mediat nga Presidenca, ku thuhet se: Në mesditë Presidenti i Republikës SH.T.Z.Bajram Begaj do të presë në Institucionin e Presidentit Kryetarin e Partisë Socialiste Zotin Edi Rama për ta mandatuar për formimin e qeverisë së re.”
Sipas procedurave, sekretari i Përgjithshëm i PS-së dërgon emrin e kryeministrit, në këtë rast Edi Rama, ndonëse është thjesht procedurë pasi është një qeveri e konfirmuar me 83 mandate. Më pas është kryeministri Rama që paraqet emrat e kabinetit të ri në Presidencë. Pasi ky i fundit merr kërkesën, ka 6 ditë kohë për të bërë dekretimin. Në përfundim bëhet betimi i të gjithë kabinetit të ri qeveritar.
Pak më herët, në Kuvend u mbajt seanca e parë e kësaj legjislature ku u miratua komisioni i përkohshëm për verifikimin e mandative, i cili u ngrit vetëm me votat e mazhorancës. Pas ngritjes së komisionit, drejtuesi i seancës Vasil Llajo bëri me dije se do të verifikohen mandatet dhe seanca e ardhshme do të zhvillohet në orën 17:00.
