Kremlini ka pranuar zyrtarisht se negociatat për paqe mes Rusisë dhe Ukrainës janë të pezulluara, duke konfirmuar paralajmërimet e vazhdueshme të Kievit për mungesën e progresit në dialogun dypalësh, raporton CNN.
Zëdhënësi i Kremlinit, Dmitry Peskov, tha të premten se: “Kanalet e komunikimi ekzistojnë dhe negociatorët tanë mund t’i përdorin ato. Por për momentin, është më e saktë të thuhet se bisedimet janë në pauzë sesa në një proces aktiv.”
Peskov shtoi se Rusia “mbetet e përkushtuar ndaj dialogut paqësor”, por i këshilloi palët të mos ushqejnë iluzione për rezultate të shpejta.
Zelensky: Rusia nuk kërkon paqe, vetëm kohë për të forcuar luftën
Nga ana tjetër, Kievi ka akuzuar sërish Presidentin Vladimir Putin për përdorim taktik të negociatave, me qëllim që të fitojë kohë për rimëkëmbjen e ekonomisë dhe për të rritur kapacitetet ushtarake.
Presidenti Volodymyr Zelensky, në një deklaratë publike të premten, falënderoi Britaninë e Madhe dhe Japoninë për sanksionet e reja të vendosura ndaj rrjetit logjistik ushtarak dhe të transportit të naftës të Rusisë.
“Vetëm kështu mund ta ndalojmë Rusinë dhe t’i japim fund këtij lufte”, theksoi Zelensky.
Trump i zhgënjyer: “Durimi im po mbaron”
Presidenti amerikan Donald Trump, i cili po përpiqet të luajë rol ndërmjetësues në krizë, ka shprehur hapur pakënaqësinë e tij ndaj Putinit, duke deklaruar se: “Durimi im me të po mbaron me shpejtësi.”
Trump nuk përjashtoi një raund të ri sanksionesh ndaj Moskës, ndërsa zyrtarë të administratës së tij pranojnë se po shtohet presioni i Kongresit për një qëndrim më të ashpër ndaj Kremlinit.
