Trajneri i ri i Tiranës, Roberto Bordin, kërkon të nisë aventurën e tij te bardheblutë me një fitore. Skuadra do të presë nesër Flamurtarin në “Selman Stërmasi”, në orën 16:00, në kuadër të kampionatit shqiptar.
Në një konferencë për media para ndeshjes, italiani shprehu kënaqësinë për sfidën dhe besimin te stafi drejtues dhe lojtarët:
“Faleminderit për urimet, e kemi pranuar me kënaqësi këtë sfidë të rëndësishme, pasi Tirana është ekipi më i titulluar në Shqipëri. Objektivi ynë është të jemi shumë lart.”
Bordin theksoi rëndësinë e kohës për t’u njohur me lojtarët dhe për të ndërtuar një ekip të fortë, duke shtuar se momentalisht skuadra ka disa mungesa në mbrojtje, por pjesa ofensive është e fortë.
Trajneri shprehu besimin e tij te tifozët:
“E di që tifozeria e Tiranës është më e mira në Shqipëri. Jam i bindur që do të vijnë të shumtë në stadium për të na mbështetur. Ua kam thënë edhe lojtarëve që besoj janë të ndërgjegjshëm për fanelen që veshin. Lojtarët duhet të bëjnë atë që tifozët të duken si lojtari i 12-të në fushë.”
Bordin theksoi gjithashtu rëndësinë e lojës me zemër dhe ecurisë pozitive, duke e konsideruar rikthimin në shtëpi një avantazh të madh për ekipin. Nesër Tirana do të kërkojë tre pikët e para me trajnerin e ri, duke u mbështetur te mbështetja e tifozëve dhe dëshira për sukses.
