Vendimi i Edi Ramës për të zgjedhur Ogerta Manastirliun si kandidate të Partisë Socialiste për Bashkinë e Tiranës ka mbyllur automatikisht kapitullin e shkurtër të Anuela Ristanit si kryetare e deleguar e kryeqytetit.
Në një reagim në rrjete sociale , Ristani nuk bëri asnjë bilanc kritik për periudhën problematike që përjetoi Tirana, por u fokusua në falënderime për kryeministrin Rama dhe për Erion Veliajn, duke e cilësuar transformimin e qytetit si “frytin e vizionit dhe punës së përbashkët”.
Ajo shmangu referencat ndaj çështjeve që kanë ndezur debat publik, duke zgjedhur të përmbyllë mandatin e saj të përkohshëm me tone entuziaste dhe politike.
“Në thellësinë e ndërgjegjes sime, kam bërë gjithçka që kam mundur, duke e ndier këtë përgjegjësi si një detyrim moral dhe qytetar: me vendosmërinë për të mos çbërë asnjë milimetër nga progresi i arritur gjatë këtyre dhjetë viteve”, shprehet Ristani, teksa falënderon kryetarin e bashkisë Erion Veliaj, i cili ndodhet në paraburgim prej muajsh.
“Transformimi i madh që Tirana ka përjetuar është fryt i vizionit dhe i punës së përbashkët të një skuadre të përkushtuar. Për këtë përvojë si qytetare dhe bashkëpunëtore do të jem gjithmonë mirënjohëse ndaj Kryetarit Erion Veliaj. Qyteti ynë është rritur. Është sot më modern, më i gjallë, me më shumë shërbime, më social, me më shumë investime në infrastrukturë, arsim, kulturë e sport, me më shumë hapësira publike e gjelbërim. Dhe ky është një rrugëtim që vazhdon”, u shpreh ajo ndër të tjera.
