Rusia ka njoftuar tërheqjen nga Konventa Evropiane për Parandalimin e Torturës. Presidenti Vladimir Putin ka paraqitur një projektligj për këtë vendim në parlamentin rus.
Me këtë hap, Komiteti kundër torturës i Këshillit të Evropës (CPT) nuk do të ketë më mundësi të monitorojë gjendjen në burgjet dhe qendrat e paraburgimit në Rusi.
Rusia ishte pjesë e konventës që prej vitit 1997, por organizatat për të drejtat e njeriut kanë denoncuar vazhdimisht praktikat e torturës në stacionet e policisë dhe në sistemin penitenciar rus. Edhe të burgosurit ukrainas të luftës, të shkëmbyer gjatë konfliktit, kanë raportuar për tortura dhe trajtime çnjerëzore.
Konventa, e miratuar në vitin 1987 nga Këshilli i Evropës, është një nga mekanizmat më të rëndësishëm për mbrojtjen e të drejtave të njeriut në kontinent. Rusia u përjashtua nga Këshilli i Evropës në vitin 2022 për shkak të agresionit ndaj Ukrainës dhe tashmë justifikon tërheqjen nga konventa duke thënë se nuk mund të marrë pjesë në punën e komitetit.
