I penduari i drejtësisë Nuredin Dumani vazhdon të jetë ende nën kujdes intensiv në reanimacionin e kardiologjisë në Qendrën Spitalore “Nënë Tereza” në Tiranë.
Ai u dërgua me urgjencë mbrëmjen e djeshme nga ambientet e paraburgimit 313 ku po mbahej i izoluar drejt spitalit në gjendje të rëndë, pasi shfaqi probleme me zemrën dhe frymëmarrjen, duke i rënë dhe të fikët.
Burime bëjnë me dije se mjekët ende nuk i kanë konstatuar saktësisht diagonizën e Nuredin Dumanit, teksa po i nënshtrohet një sërë analizash të specializuara për të vlerësuar gjendjen e tij të plotë shëndetësore.
Për shkak të statusit të tij të veçantë si i penduar i SPAK, mjekët dhe autoritetet po verifikojnë çdo pistë të mundshme, përfshirë edhe dyshimet për një tentativë të helmimt të mundshëm ndaj tij.
Mediat raportuan se Nuredin Dumani ka qenë duke ngrënë karkaleca në qelinë e tij, në momentin kur zemra e tij ka shfaqur probleme, duke patur ritme më të shpeshta se normalja dhe më pas trupi i tij ka rënë në gjendje të fikti.
Nuk dihen detajet nëse karkalecat ja kishte dërguar dikush nga jashtë apo jo.
Nuredin Dumani, i konsideruar si vrasës me pagesë, është një nga bashkëpunëtorët më të rëndësishëm të Prokurorisë së Posaçme (SPAK). Dëshmitë e tij, të përforcuara edhe nga komunikimet në aplikacionin “Sky Ecc”, kanë bërë që SPAK të godasë disa grupe kriminale në Elbasan, Tiranë, Durrës dhe Shkodër, si dhe të zbardhë një sërë ngjarjesh kriminale.
