Presidenti ukrainas Volodymyr Zelenskyy ka deklaruar se pas përfundimit të luftës në Ukrainë pritet të vendosen mijëra trupa të huaja si pjesë e garancive të sigurisë për vendin.
“Është e rëndësishme që po diskutojmë të gjitha këto. Po, patjetër që do të jenë mijëra, jo vetëm disa. Dhe ky është një fakt”, tha Zelenskyy gjatë një vizite në qytetin Uzhhorod.
Një ditë më parë, presidenti francez Emmanuel Macron bëri të ditur se 26 vende janë zotuar të ofrojnë garanci sigurie për Ukrainën, duke përfshirë një forcë të përbashkët ndërkombëtare në tokë, det dhe ajër. Sipas tij, disa vende do të kontribuojnë edhe jashtë territorit ukrainas, përmes trajnimit dhe pajisjes së forcave të Kievit.
Nga ana tjetër, presidenti rus Vladimir Putin paralajmëroi se çdo forcë perëndimore që vendoset në Ukrainë do të shihet si objektiv i ushtrisë ruse.
“Nëse ndonjë forcë shkel atje, veçanërisht tani kur ka beteja, ne do t’i konsiderojmë ata një objektiv legjitim për ushtrinë ruse,” tha Putin në një fjalim në Forumin Ekonomik Lindor në Vladivostok.
Ai shtoi se në rast se arrihet një marrëveshje paqeje, nuk do të ketë arsye për praninë e trupave të huaja në territorin e Ukrainës.
