Qeveria shqiptare dhe grupi i ekspertëve i drejtuar nga Arben Rakipi nuk tërhiqen nga Kodi i ri Penal pavarësisht kontestimeve të shumta e kritikave.
Gazetari Ferdinand Dervishi i ftuar në Syri Tv denoncon skandalin se Kodi është bërë në fshehtësi të plotë, pa transparencë dhe për të mbyllur problemet që ka qeveria Rama, që ai e quan ‘shteti mafioz’
“Është bërë në fshehtësi. Për vite me radhë punohet nga një grup që shoqëria civile nuk e di. Dhe nga një grup me persona që mund të kenë përvojë dhe nga regjimi i kaluar. Ky kod që kemi është prodhuar nga Kodi Italian dhe duhet patjetër që të ribëhet, por puna është pse e mban sekret dhe ndërhyn në disa pika që kanë të bëjnë me problemet aktuale?
Futesh fort tek gazetarët dhe tek veprat penale që kanë lidhje me korrupsionin. Pse? Kjo është ndërhyrje në Kodin Penal në një shtet mafioz për të zbutur e sheshuar problemet që ka vetë. Kjo më tremb. Nga 76 nene të bëhen 219 më duket e fryrë.
Ai thotë se Kodi i ri Penal, ‘nen për nen duhet të hidhet në shqyrtim publik e duhet riformuluar.”
Në tryezën e sotme të diskutimit drejtori i magjistraturës lëshoi një deklaratë të papritur kur bëri fakt të kryer dënimin për shpifje duke argumentuar se gazetarët do ndiheshin të fyer nëse nuk futen në burg.
25 tryeza janë parashikuar të mbahen në vijim për diskutimet e këtij drafti, mes kontestimeve për parashikime represive dhe insistimit me çdo kusht të qeverisë për ta kaluar në kuvend.
