Po mbahen në hollin e Teatrit Kombëtar të Operas dhe Baletit homazhet për lamtumirën e fundit të regjisorit Dhimitër Anagnostit, i cili u nda nga jeta pas një beteje të gjatë me një sëmundje të rëndë.
Aktorë, regjisorë, bashkëpunëtorë të afërt, figura të njohura të artit dhe politikës, si dhe qytetarë të shumtë, po i japin sot nderimet e fundit mjeshtrit të madh, i cili la pas një trashëgimi të pasur dhe të paharrueshme në kulturën shqiptare.
Homazhet do të vijojnë deri në orën 13:00.
Sipas amanetit të tij, Dhimitër Anagnosti do të prehet në Vuno të Himarës, vendlindjen që e mbajti gjithmonë pranë zemrës dhe të cilën e përmendi me dashuri përgjatë gjithë jetës.
Në shenjë nderimi për figurën e tij, 2 Shtatori është shpallur Ditë Zie Kombëtare. Flamujt në të gjithë vendin janë ulur në gjysmështizë, ndërsa institucionet shtetërore po zhvillojnë homazhe për të përkujtuar jetën dhe veprën e një prej personaliteteve më të mëdha të artit shqiptar.
