Nga Boldnews.al
Historia e Aida Hajnajt në krye të Byrosë Kombëtare të Hetimit nuk është thjesht një mandat i mbyllur. Është një shembull i qartë sesi klientelizmi dhe pazaret institucionale vendosin mbi meritën, duke lënë qytetarët pa përgjigje dhe drejtësinë peng të interesave politike.
Më 1 shtator 2025, Këshilli i Lartë i Prokurorisë (KLP) vendosi të lirojë nga detyra Aida Hajnajn, me argumentin se mandati i saj përfundoi më 31 gusht. Por kjo nuk ishte surprizë. Në fakt, edhe hyrja e saj në këtë post u shoqërua me dyshime të thella: që përpara se të hapej gara, emri i saj ishte vendosur si fituese. Kandidatët e tjerë morën pjesë vetëm për të plotësuar procedurën, ndërsa vendimi real ishte marrë më parë.
Asokohe, as KLP dhe asnjë institucion tjetër nuk dha ndonjëherë një shpjegim të qartë mbi arsyet pse u përzgjodh pikërisht Hajnaj. Pyetjet mbi kriteret e emërimit mbetën pa përgjigje, duke forcuar perceptimin se nuk ishte meritokracia që vendosi, por marrëveshjet e prapaskenës.
Një tjetër pikë që shton dyshimet është mënyra se si ajo kaloi testet fizike të detyrueshme për kandidatët, përfshirë provën e vrapimit. Publiku nuk mori asnjëherë një informacion zyrtar mbi rezultatet e saj. Heshtja institucionale mbi këtë aspekt vetëm sa forcon bindjen se rregullat nuk vlejnë për të gjithë njësoj.
Edhe përfundimi i mandatit u shoqërua me tension. Gjashtë anëtarë të KLP-së votuan që mandati i saj kishte mbaruar, ndërsa katër të tjerë mendonin se ajo duhej të qëndronte deri në zgjedhjen e pasuesit. Në çdo rast, rikandidimi i saj ishte i pamundur: ajo u përjashtua nga gara pasi nuk dorëzoi dokumentacionin brenda afatit ligjor, më 7 maj 2025.
Ky rast nuk është i izoluar. Është pjesë e një modeli ku fituesi i garës dihet përpara se të nisë procesi, kriteret përdoren vetëm për fasadë dhe mungesa e transparencës mbizotëron. Pas largimit të Hajnajt, SPAK ka hapur garën për drejtuesin e ri të BKH-së, me shtatë kandidatë në listë. Por pyetja thelbësore mbetet: a do të kemi më në fund një proces të hapur dhe meritokratik, apo thjesht një përsëritje të një skenari tashmë të njohur?
Mandati i Aida Hajnajt nuk mbyllet vetëm si një faqe personale e karrierës së saj. Ai është një pasqyrë e zymtë e një sistemi ku klientelizmi sundon mbi ligjin, ndërsa heshtja e institucioneve është dëshmia më e qartë se drejtësia në Shqipëri vazhdon të funksionojë me dy standarde.
