Deputeti i zgjedhur i Partisë Demokratike, Klevis Balliu, ka hedhur akuza të forta ndaj biznesmenit Gjergj Luca, duke e lidhur atë me persona të përfshirë në trafik dhe duke deklaruar se është kërcënuar me procedim penal.
Në një postim ironik në Facebook, Balliu e përshkruan Lucën si “super peshkatarin e preferuar të qeverisë”, që sipas tij gëzon mbështetje të madhe politike dhe mediatike.
Deputeti demokrat akuzoi gjithashtu qeverinë për mbështetje ndaj biznesmenit, ndërsa e paralajmëroi Lucën që “të ulë dozën e dashurisë për Ramën”.
Postimi i plotë:
Gjergj Luca, ortaku i atij trafikantit të arrestuar, më kërcënon me procedim penal tek mediat e pushtetit si Carlo Baze & kompani.
450 procedime penale më ka bërë qeveria jote; nëse shtohesh edhe ti, nuk më impresionon aspak.
Luca është në fakt super peshkatar – duket sikur vetëm ai kap peshk. Aq shumë peshk ka kapur, sa ka ndërtuar një qytet të tërë që e quan “Fish City”.
Është i vetmi peshkatar, të paktën që njoh unë, që gëzon një mbështetje mediatike të jashtëzakonshme – aq të madhe sa do t’ia kishin zili çdo politikan në Shqipëri e më gjerë.
Gëzon edhe përkrahjen e qeverisë, dhe e dashuron qeverinë. Ka edhe ortakun trafikant. Janë këto personazhet që qeveria i do fort. Po sikur të donte qeveria Shqipërinë dhe shqiptarët aq sa i do këta, sot Shqipëria do ishte në Europë dhe shqiptarët do ishin ndër popujt më të lumtur të kontinentit. Ose, të paktën, aq të lumtur sa Gjergj Luca.
Luc, të sugjeroj që edhe këtë dashurinë për Ramën ta ulësh pak në dozë, se nuk duket aspak natyrale. Mos bëj gabimin e atij shokut tënd në Pogradec.
Sa për zilen, shiko se më duket ta kanë varur në qafë.
