Gjykata e Posaçme kundër Korrupsionit dhe Krimit të Organizuar caktoi masën e sigurisë “arrest me burg” për inspektorin e IMT Tiranë, Gerald Fuçia, i akuzuar se ka kërkuar 1000 euro ryshfet për disa tenda pa leje.
Në seancën me dyer të mbyllura, Fuçia i mohoi akuzat dhe tha se nuk kishte asnjë lidhje me ngjarjen, duke theksuar se nuk e njihte qytetarin që bëri denoncimin.
“Nuk e njoh fare qytetarin, as e kam kontaktuar, as takuar, as nuk di gjë për ryshfetin. Deklaroj me përgjegjësi morale dhe ligjore se nuk kam lidhje me këtë histori,” u shpreh ai.
Avokatja e tij deklaroi se paratë ishin marrë nga një tjetër i akuzuar, Klajdi Zhilla, ndërsa Fuçia nuk kishte pasur kontakte me qytetarin që bëri denoncimin.
Në kuadër të të njëjtit operacion, në pranga u vu edhe punonjësi i IMT Tiranë, Edmond Çela. Ndërkohë, Klajdi Zhilla, i shpallur më herët në kërkim nga SPAK, u vetëdorëzua sot në polici.
