Është zbardhur ngjarja e ndodhur mesditën e djeshme në Kombinat, ku një konflikt mes disa të rinjve degjeneroi në të shtëna armësh. Policia ka njoftuar arrestimin e dy personave dhe procedimin penal të katër të tjerëve të përfshirë.
Në pranga kanë rënë, Oltjon Asllani (Vodollari), 28 vjeç, i dyshuar si autori që qëlloi me armë zjarri;
Dhe Serxho Bajza, 30 vjeç, i cili dyshohet se drejtonte automjetin nga ku u krye qitja.
Nga hetimet paraprake rezulton se pas një sherri për motive të dobëta, Asllani ka qëlluar disa herë në drejtim të automjetit me të cilin po lëviznin shtetasit R. K. (38 vjeç) dhe Zh. K., duke shkaktuar vetëm dëme materiale.
Për ngjarjen janë proceduar penalisht edhe shtetasit R. K., Zh. K., F. K. dhe B. M., të cilët ishin përfshirë në konfliktin paraprak.
Policia ka sekuestruar automjetin e përdorur nga autorët, ndërsa arma e zjarrit nuk është gjetur ende.
