Gjeneva po konsiderohet si vendi i mundshëm ku mund të zhvillohet një samit i paqes mes presidentit rus Vladimir Putin dhe homologut të tij ukrainas, Volodymyr Zelensky, një nismë e propozuar fillimisht nga presidenti francez, Emmanuel Macron.
Macron, pas vizitës në Shtëpinë e Bardhë, deklaroi se samiti duhet të mbahet në një “vend neutral, ndoshta në Zvicër – po shqyrtoj Gjenevën – ose në një tjetër shtet”, duke theksuar se ky është një vullnet i përbashkët i liderëve.
Ministri i Jashtëm zviceran, Ignazio Cassis, konfirmoi mëngjesin e sotëm se vendi i tij është i gatshëm të organizojë takimin, duke theksuar rolin historik të Zvicrës dhe statusin e Gjenevës si seli evropiane e OKB-së.
Megjithatë, një pengesë ligjore mbetet e madhe: si firmëtare e Statutit të Romës, Zvicra ligjërisht do të duhej të arrestonte Putinin për shkak të urdhër-arrestit ndërkombëtar. Cassis la të kuptohet se mund të gjendet një rrugëdalje përmes një imuniteti të përkohshëm, me qëllim të mundësohet realizimi i bisedimeve.
