Policia e Vlorës, në bashkëpunim me atë të Himarës, në kuadër të operacionit të koduar “Koordinata”, kanë goditur një rast të kultivimit të bimëve narkotike.
Si rezultat janë arrestuar dy persona, shtetasit Fatmir Suli, 62 vjeç dhe Çelik Xhebra, 47 vjeç, të cilët akuzohen për veprën penale “Kultivimi i bimëve narkotike” kryer në bashkëpunim.
Ata janë filmuar me dron, duke u kujdesur për parcelën me kanabis, ku më pas kanë ndërhyrë efektivët, duke i kapur në flagrancë.
Sipas autorieteve, në prroin mes fshatrave Lukovë dhe Shën Vasil, në një zonë me bimësi të dendur dhe shkurre, këta dy shtetas në bashkëpunim me njëri-tjetrin kishin kultivuar rreth 150 bimë narkotike kanabis sativa.
Në cilësinë e provës materiale janë sekuestruar 20 bimë narkotike, ndërsa pjesa tjetër e bimëve u asgjësua nëpërmjet djegies. Gjithashtu, raportohet se janë sekuestruar dhe 3 telefona celular, vegla pune dhe sende të tjera që përdoreshin nga dy shtetasit për këtë veprimtari kriminale.
Materialet procedurale i janë referuan Prokurorisë së Vlorës për veprime të mëtejshme.
