Më shumë se 100 organizata humanitare ndërkombëtare, përfshirë Oxfam dhe Mjekët pa Kufij, kanë firmosur një letër të përbashkët drejtuar autoriteteve izraelite, duke kërkuar ndalimin e pengesave në shpërndarjen e ndihmave për popullsinë civile palestineze në Rripin e Gazës.
Në letrën e hapur, organizatat akuzojnë Izraelin për përdorimin e ndihmave si mjet lufte, ndërsa paralajmërojnë për një krizë të thellë humanitare, me spitale që po mbeten pa furnizime dhe fëmijë që po vdesin nga uria dhe sëmundje të parandalueshme.
Sipas tyre, rregullat e reja të vendosura nga Izraeli përfshijnë kërkesa për shpërndarjen e informacioneve të ndjeshme, përfshirë të dhëna mbi punonjësit palestinezë që punojnë për këto organizata. Në rast se nuk përmbushen këto kërkesa, organizatat rrezikojnë bllokimin total të operacioneve të tyre në Gaza.
Raste të shumta të ndihmave të bllokuara
Organizata Anera raportoi se aktualisht ka mbi 7 milionë dollarë ndihma të bllokuara në portin e Ashdodit, përfshirë 744 ton oriz, i mjaftueshëm për më shumë se 6 milionë vakte.
Po ashtu, vetëm në muajin korrik, mbi 60 kërkesa për leje hyrjeje për ndihma janë refuzuar, ndërsa që nga 2 marsi, shumica e organizatave nuk kanë mundur të dorëzojnë asnjë kamion ndihmash.
Izraeli mohon akuzat, përmend rreziqet e përfshirjes së Hamasit
Zyrtarët izraelitë mohojnë akuzat dhe thonë se rregullat kanë për qëllim të garantojnë që ndihmat të mos përfundojnë në duart e Hamasit. Ata thonë se ndihmat “po hyjnë në Gaza përmes organizatave të regjistruara”, duke shtuar se rreth 300 kamionë hyjnë çdo ditë, edhe pse OKB vlerëson se nevoja është për rreth 600 kamionë në ditë.
Sipas Ministrisë izraelite të Diasporës, regjistrimi i një organizate mund të refuzohet nëse ajo mohon karakterin demokratik të Izraelit ose “promovon delegjitimimin” e tij. Ministri Amichai Chikli tha se shumë OJQ “shërbejnë si mbulesë për aktivitete armiqësore”, ndërsa theksoi se ato që veprojnë me integritet do të lejohen të operojnë.
