Sulmuesi shqiptar Marvin Çuni, blerja e parë e Sampdorias në këtë merkato verore, ka shprehur entuziazmin e tij për aventurën e re në Serie B italiane.
Në një intervistë për “La Repubblica”, ai tregoi emocionet e para dhe pritshmëritë për sezonin që vjen.
“Çfarë pritjeje… mezi po pres të nis ta shpërblej besimin e klubit. Kjo aventurë e re më magjeps”, u shpreh Cuni, duke shtuar se është në harmoni të plotë me filozofinë e trajnerit Donati:
“Jam dakord me teorinë e tij për të ecur ‘me drita të fikura’, ndeshje pas ndeshjeje. Por kur vjen të luash te Sampdoria, e di çfarë të pret dhe çfarë ambiciesh duhet të kesh. Ky klub ka një emër të madh dhe tifozë që të bëjnë të dyfishosh përpjekjet”.
I pyetur për largimin nga futbolli rus, Cuni tha se ambienti nuk ishte i përshtatshëm për të: “Në Rusi shkonte minus 20 gradë në dimër… nuk durohej. Nuk u përshtata dot. Luhej futboll ndryshe, ishte mentalitet tjetër. Aty kuptova sa e bukur është Italia, do të jetoja këtu përgjithmonë e ndjej si shtëpinë time”.
Me ambicie të qarta dhe motivim të lartë, Cuni synon të japë kontribut të rëndësishëm për rikthimin e Sampdorias në elitën e futbollit italian.
