Dinamo është kualifikuar për në Play Off të Conference League, pasi mundi 3-1 Hajdukun e Splitit në “Air Albania”. Koha e rregullt përfundoi 1-0 ndërsa për fituesin, u desh koha shtesë.
Zabërgja realizoi për dinamovitët, pas 14 minutash lojë, duke ndezur festën e ekipit të drejtuar nga Ilir Daja. Kroatët shtuan presionin dhe u vendosën në kërkim të golit të barazimit.
Hajduku jo vetëm që nuk e gjeti atë brenda kohës së rregullt, por në të 78-të, mbeti me një lojtar më pak pas daljes me karton të kuq të Sanyang. Në shtesë do ishte Karaçiç që do ndëshkonte Dinamon.
Blutë treguan mjaft dëshirë në fushë dhe realizuan dy herë me Qardakun dhe Berishën, duke marrë kështu një sukses të madh dhe duke zhvlerësuar humbjen 2-1 në ndeshjen e parë.
Dinamo shkon kështu në play off të Conference League, me synimin e vetëm grupet.
Nga ana tjetër, Egnatia i ka dhënë fund aventurës europiane për këtë edicion, duke u eliminuar në turin e tretë të Ligës së Konferencës pas një ndeshjeje dramatike ndaj Olimpija Ljubljanës. Pavarësisht dëshirës për fitore pas barazimit 0-0 në sfidën e parë, kampionia e Superiores u ndal pas 120 minutash loje.
Në Rrogozhinë, rrogozhinasit e nisën vrullshëm, duke shënuar katër herë në tetë minutat e para, por vetëm goli i Lushkjes u konsiderua i rregullt. Ekipi i Tetovës mbajti kontrollin deri në momentin kur një goditje këndi solli barazimin e miqve, të cilët më pas fituan besim dhe presionuan fort.
Në pjesën e dytë, Olimpija kaloi në avantazh dhe situata u vështirësua më tej kur Jahaja u ndëshkua me karton të kuq.
Megjithatë, Lushkja riktheu shpresat me golin e dytë personal, duke çuar ndeshjen në shtesa. Aty, dy zëvendësues të skuadrës sllovene, Durdov dhe Blanko, shënuan në secilën pjesë shtesë, duke vulosur eliminimin e Egnatias dhe mbyllur kështu një rrugëtim europian të mbushur me emocione dhe pengje.
