Dy persona janë arrestuar nga Policia e Beratit, pasi u kapën në flagrancë në një parcelë ku kishin kultivuar bimë narkotike të dyshuara si Cannabis Sativa. Ngjarja është zbuluar në kuadër të operacionit policor “Koordinata”, që po zhvillohet kundër kultivimit të bimëve narkotike.
Të arrestuarit janë shtetasit Sefedin Mehmetaj, 29 vjeç dhe Ronaldo Mehmetaj, 26 vjeç, të afërm të njëri-tjetrit. Ata u kapën në zonën e quajtur “Moçali”, në fshatin Osmëzezë, gjatë një kontrolli të ushtruar nga shërbimet e Komisariatit të Policisë Berat dhe Forca e Posaçme Operacionale e DVP Berat.
Në parcelë u gjetën dhe më pas u asgjësuan 64 bimë narkotike. Sipas Policisë, pas veprimeve procedurale, të dy shtetasit u arrestuan për veprën penale “Kultivimi i bimëve narkotike”, kryer në bashkëpunim.
Gjithashtu, gjatë kontrollit në banesën e Sefedin Mehmetajt, u gjet dhe u sekuestrua një armë gjahu e tipit çifte dhe disa fishekë.
