Autoriteti Kombëtar i Veterinarisë dhe Mbrojtjes së Bimëve ka publikuar bilancin paraprak të dëmeve që kanë shkaktuar zjarret në bashkitë Delvinë, Finiq dhe Gramsh. Grupi i punës ka nisur verifikimet në terren, duke evidentuar dëme të konsiderueshme në blegtori dhe bujqësi.
Në fshatrat Tremul dhe Aliko janë djegur kullota dhe parcela me ullinj, por nuk janë raportuar humbje në bagëti. Ndërkohë, në njësinë administrative Dhivër, për shkak të rrezikut nga mungesa e ushqimit, fermat janë zhvendosur në zona të sigurta.
Në Sirakat është djegur një stallë me 4 viça, si dhe dy parqe bletësh me gjithsej 197 zgjoje. Situata paraqitet më e rëndë në Bashkinë e Delvinës, ku dyshohet se është djegur një fermë me 25 krerë të imtash dhe 9 parqe bletësh, me rreth 500 zgjoje në total.
Në fshatrat Skëndërbegas, Arunas, Shëmbërdhenjë, Bletës dhe Kullollas janë djegur 9 krerë gjedh, 95 krerë të imtash dhe 50 zgjoje bletësh.
