Ish-ministri i Bujqësisë, Edmond Panariti, ka paralajmëruar përkeqësimin e situatës nga temperaturat ekstreme dhe zjarret masive, duke theksuar se vendi po përjeton një klimë tropikale, jo më mesdhetare, për shkak të ndryshimeve radikale klimatike.
Sipas tij, zjarret e përmasave apokaliptike kanë përfshirë të gjithë territorin e Shqipërisë, nga veriu në jug, me qendrën e rëndesës në jug të vendit, por me vatra të shpërndara kudo. Ai e cilësoi gjendjen si emergjente dhe jashtëzakonshme, duke i bërë thirrje qeverisë që të shpallë menjëherë gjendjen e katastrofës natyrore, në mënyrë që të mundësohet ndërhyrja me mbështetje direkte për banorët e dëmtuar.
Panariti kritikoi indiferencën institucionale, duke theksuar se dëmet nuk kufizohen vetëm te ekosistemet, por përfshijnë shkatërrimin e dhjetëra hektarëve me bimësi, shkurre, korie e pyje. “Rivendosja e ekuilibrit ekologjik do të kërkojë vite të tëra”, u shpreh ai.
“Nëse qëndrojmë apatik dhe themi “he se do kalojë kjo situatë”, kur tashmë ka gati më shumë se një dekadë që është kthyer në normë ku temperaturat shumë të larta dhe vera që tashmë po përjeton një klimë tropikale, jo mesdhetare, falë ndryshimeve radikale klimatike.
Këto po përkthehen në zjarre të përmasave apokaliptike që tashmë kanë përfshirë tërë territorin e Shqipërisë, që nga veriu e deri në jug, pavarësisht se qendra e rëndesës vazhdon të jetë jugu i Shqipërisë, por vatra kemi kudo.
Pra, është një situatë emergjente e jashtëzakonshme dhe qeveria nuk duhet të hezitonte aspak për të shpallur gjendjen e katastrofës natyrore në mënyrë që të bëntë të detyrueshme edhe ndërhyrjen me mbështetje direkte për të gjithë ata banorë që janë dëmtuar jashtëzakonisht.
Nuk duhet të jemi kaq të pandjeshëm sa ta mbyllim këtë me një “e kemi situatën nën kontroll”, kemi rrënim, shkatërrim total, jo vetëm të ekosistemeve të tëra, por të kemi parasysh që janë dëmtuar me dhjetëra hektarë bimësi, shkurre, korie e pyje.
Pra, një shkatërrim të ekosistemit që do të donte me vite e me vite të tëra për të rivendosur edhe një herë ekuilibrin.
Nuk ka rrugë tjetër, duhet patjetër që të merret seriozisht, duhet të alokohet një fond i madh për të parandaluar dhe për të kontrolluar situata të tilla, përkundrazi ne do të kemi një shkretëtirizim të Shqipërisë e të zonave rurale“, tha Panarit në Syri TV.
