Vetëm javën e kaluar Al-Hilal bëri një lëvizje të bujshme në merkato, duke transferuar Darwin Nunez nga Liverpool për 55 milionë euro. Edhe pse uruguiani kërkohej nga disa ekipe në ligat elitare në Europë, vetë lojtari dhe sigurisht Liverpool pranuan ofertën e ardhur nga Al-Hilal.
Klubi i drejtuar nga Simone Inzaghi po punon për të finalizuar një tjetër transferim të bujshëm.
“Bild” raporton se Al-Hilal ka ofruar 80 milionë euro për sulmuesin e Dortmundit, Serhou Guirassy, i cili shkëlqeu sezonin e kaluar me 38 gola në 50 ndeshje.
Për të bindur sa më shpejt lojtarin, klubi saudit i ka ofruar atij dyfishin e rrogës që merr aktualisht te Dortmund, nga 9 milionë euro direkt në 18 milionë euro.
Sipas raportimit në fjalë, po nga “Bild”, Dortmund e ka refuzuar ofertën e parë prej 80 milionë eurosh të ofruar nga Al-Hilal. Kjo gjë nuk është pritur mirë nga përfaqësuesit e sulmuesit.
Megjithatë, Al-Hilal nuk është dorëzuar dhe së shpejti pritet një ofertë e dytë në drejtim të Dortmundit.
