Zjarret po përhapen me shpejtësi në disa zona të Greqisë, duke shkaktuar dëme të mëdha dhe duke detyruar evakuimin e mijëra banorëve. Prej ditësh vendi është në luftë me flakët, ndërsa sot situata është përkeqësuar ndjeshëm.
Mediat greke raportojnë për banesa të dëmtuara dhe një terren të vështirë për ndërhyrjen e zjarrfikësve. Në Kato Akai, autoritetet kanë lëshuar urdhër evakuimi për mbi 7,500 banorë, pasi zjarri që shpërtheu në mesditë në Zonën Industriale të Patras po përhapet në mënyrë të pakontrollueshme në Akainë Perëndimore. Pas perëndimit të diellit, mjetet ajrore u detyruan të ndalonin operacionet.
Era e fortë dhe temperaturat e larta po favorizojnë përhapjen e flakëve edhe në zona të tjera, përfshirë ishullin e Zakynthos, ku një vatër e madhe ka përfshirë pyjet e Kiliomenos. Që nga mëngjesi, të gjitha forcat zjarrfikëse të ishullit janë angazhuar në operacione, ndërsa gjatë ditës mjetet ajrore kanë hedhur ujë për të frenuar përhapjen.
