Që prej orëve të pasdites u raportua për zjarrin në Delvinë, i cili po u afrohej puseve të “Delvina Gas”, por nuk pati asnjë reagim nga shteti me ndërhyrje nga ajri, pavarësisht kërkesave.
Kjo ka sjellë përshkallëzimin e situatës dhe pamjet apokaliptike, duke rrezikuar katastrofën e paimagjinueshme.
Siç mund ta shihni në videto e mbërritura në redaksinë e Boldnews.al, zjarri ndodhet shumë pranë puseve të hidrokarbureve, teksa aty nuk ka as edhe një mjet zjarrfikës për të punuar për shuarjen e flakëve.
Situata në vendburimin e gazit dhe të naftës që menaxhohet nga “Delvina Gas” është dramatike, teksa siç shprehet edhe denoncuesi në video, kompania e ka mbrojtur vendin aty vetëm me sistemin e saj të sigurisë, pasi shteti duket inegzistent.
“Delvina Gas e ka mbrojtur vendburimin vetëm me sistemin e saj të sigurisë, asnjë ndihmë nga zjarrfikëset, nga asnji. Të gjithë që janë komunikuar nuk kanë zgjidhur asgjë. Asnjë zjarrfikëse. Është djegur çdo gjë” – shprehet denoncuesi.
Një ndërhyrje nga ajri do të bënte që shmangej katastrofa duke shmangur zjarrin nga vendburimi i gazit dhe naftës të menaxhuar nga “Delvina Gas”.
Zjarri ka shkrumbuar të gjithë zonën pyejore, teksa në mbrëmje u përhap edhe në lagjen LLakë dhe Xhemerhallë të Delvinës.
Zjarri ndodhet edhe shumë pranë spitalit të qytetit, teksa për të shmangur tragjedinë, është urdhëruar largimi i bombolave të oksigjenit nga spitali, që të mos shkaktojnë shpërthime. Nga pamjet shihet se flakët kanë rrethuar të gjitha lagjet e qytetit, teksa njerëzit e tmerruar vrapojnë dhe bërtasin.
Qytetarët shprehen të panikosur, teksa kanë braktisur me vrpa banesat për të shpëtuar jetët e tyre.
“Po digjen shtëpi, ka panik dhe njerëzit po dalin me mbathje rrugëve, situatë apokaliptike”, dëshmon një prej tyre.
“Na dridhet trupi nga frika, gjendja është jashtëzakonisht keq, s’mund ta imagjinoni. Kërkojmë ndihmë, çfarë do bëjmë me 2 zjarrfikëse në këtë katastrofë. Po digjet Xhermallaha dhe Vllahati! Jemi larguar nga banesat, nuk e dimë çfarë bëhet më” – tha një banor tjetër.
Sipas raportimeve mediatike, në vendin e ngjarjes po punojnë vetëm 4 automjete zjarrfikëse të Delvinës për të shuar zjarrin, një situatë qesharake, duke parë përmasat e flakëve, të cilat u janë afruar banesa në qytet.
