Një aksident me pasoja fatale ka ndodhur mbrëmjen e së hënës, pak para orës 19:00, në rrugën Stahlstrasse të qytetit St. Gallen në Zvicër.
Një 44-vjeçar gjerman, duke drejtuar një furgon Mercedes, ka përplasur një fëmijë 4-vjeçar në një zonë banimi me kufizim shpejtësie 30 km/orë. Vogëlushi, i identifikuar si Dardan, kishte prindër nga Kosova dhe mbante pasaportë austriake, raportojnë mediat e huaja
Pavarësisht ndihmës së parë të dhënë nga policia dhe kalimtarët, si dhe ndërhyrjes së menjëhershme të mjekëve në Spitalin e Fëmijëve, ai ndërroi jetë dy orë pas aksidentit për shkak të plagëve të rënda.
Dëshmitarët kanë përshkruar skena të rënda nga momenti i ngjarjes, ndërsa shoferi dhe bashkëshortja e tij kanë reaguar duke thirrur shërbimet emergjente dhe dhënë ndihmë në vendngjarje.
Policia e St. Gallen ka nisur hetimet dhe ka bërë apel për dëshmitarë të tjerë që mund të kenë parë përplasjen. Ngjarja ka tronditur komunitetin lokal, ku banorët kërkojnë masa shtesë për sigurinë rrugore.
